Yaponiya bosh vaziri lavozimini tark etadi
Fumio Kisida sentabr oyidagi saylovlarda ishtirok etmasligini bildirdi. U Yaponiyani 2021 yildan buyon boshqarib kelayotgandi.
Yaponiya bosh vaziri Fumio Kisida lavozimini tark etadi. Bu haqda NHK telekompaniyasi xabar berdi.
Kisida mamlakatning hukmron Liberal-demokratik partiyasi rahbari saylovida ikkinchi muddatga nomzodini qoʻymaslik qarorini maʼlum qilgan.
Bu haqda u oʻz qarorgohida boʻlib oʻtgan matbuot anjumanida aytgan.
"Partiya oʻzgarib borayotganini koʻrsatish uchun birinchi va eng tushunarli qadam - men oʻzim rahbarlikni tark etishimdir. Men partiya raisi sifatida saylovda qatnashmayman”, - deya taʼkidladi Kisida.
Sentabr oyida Yaponiyada partiya raisligi uchun saylovlar boʻlib oʻtadi. Partiyaning yangi rahbari mamlakatning keyingi bosh vaziri boʻladi.
Kisida bosh vazir lavozimida 2021 yil oktabrdan beri ishlab keladi. U Yosixide Suga oʻrnini egallagandi. U avval mudofaa vaziri, tashqi ishlar vaziri lavozimlarida ishlagan.
Avvalroq Yaponiya bosh vaziri kuchli zilzila xavfi sabab Oʻzbekistonga safarini bekor qilgandi.