Oʻshda kuchli sel oqibatida favqulodda holat joriy etildi
Sel shahardagi infratuzilmaga jiddiy zarar yetkazgan.
Qirgʻizistonning Oʻsh shahrida kuchli sel oqibatida favqulodda holat joriy etildi. Bu haqda "Kabar" axborot agentligi xabar berdi.
Qirgʻiziston Respublikasi Favqulodda vaziyatlar vazirligi matbuot xizmati xabar berishicha, ushbu rejim shahar hokimi tomonidan sodir boʻlgan sel oqibatlarini bartaraf etish va boshqa tezkor choralarni koʻrish maqsadida joriy etilgan. Shahar bozorini ham sel bosgani tasvirlari tarqaldi.
Oʻsh shahrida sel bir ayol va uning uch qizini olib ketgani haqida xabar berilgan.
Shuningdek, Andijonda Qirgʻizistondan oqib kelgan jasad topilgan.
Iyun oyining oxirida ham Oʻsh viloyatining Nookat tumanida sodir boʻlgan vayronkor sel aholi va sayyohlar orasida qurbon boʻlishiga olib kelgandi. Halok boʻlganlar orasida bolalar ham boʻlgan.
Eslatib oʻtamiz, kuchli sel sabab Andijonda koʻprik buzilib ketgandi.