Ekologiya boshliqlari yoppasiga ishdan olinishiga izoh berildi
Hududiy rahbarlar bilan 1 iyulga qadar muddatli mehnat shartnomalari tuzilgan.
Ekologiya, atrof-muhitni muhofaza qilish va iqlim oʻzgarishi vazirligi hududiy boshqa boshliqlarining ishdan olinishi masalasiga izoh berdi.
Maʼlum boʻlishicha, Qoraqalpogʻiston Respublikasi Ekologiya, atrof-muhitni muhofaza qilish va iqlim oʻzgarishi vaziri, Toshkent shahar va viloyatlar Ekologiya, atrof-muhitni muhofaza qilish va iqlim oʻzgarishi boshqarmalari boshliqlari bilan joriy yilning 1 aprelidan 1 iyulga qadar muddatli mehnat shartnomalari tuzilgan.
"Mazkur mehnat shartnomalari muddati joriy yilning 1 iyul kuni tugaganligi sababli vazirlikning hududiy boshqarmalari boshliqlari bilan tuzilgan mehnat shartnomalari bekor qilingan va hozirgi kunda keyingi muddatga ular bilan mehnat shartnomalarini rasmiylashtirish ishlari olib borilmoqda" deyiladi rasmiy izohda.
Eslatib oʻtamiz, avval Qoraqalpogʻiston Respublikasi, Toshkent shahri va yana 8 ta viloyatda ekologiya boshqarmalari boshliqlari ishdan olingani xabar berilgandi. Bu haqda vazir Aziz Abduhakimovning buyrugʻi imzolangan.