Platina koʻtargan mavzuni iqtisodchilar ham yoza boshladi
Aynan qatʼiy soliq boʻyicha kelishilgan intervyudan Soliq qoʻmitasi vakili qochib ketgan edi.
Iqtisodchi Otabek Bakirov aylanmadan olinadigan qatʼiy soliqning absurdligini yozib chiqib, kichik biznes vakillarining umidi davlat rahbaridan ekanini bildirdi.
"Axir bu qatʼiy soliq toʻlovchilar na soliqchilarning oldiga boʻyin egib kelishsa, na turli-tuman ogʻzaki tushadigan majburiyatlarni bajarishsa. Belgilangan qatʼiy soligʻini toʻlaydi, boʻldi. Bu qanaqa bedodlik?", deb yozdi Bakirov.
Iqtisodchining eʼtibor qaratishicha, mazkur soliqni kichik biznes Oʻzbekistonda gullab-yashnashi va hal qiluvchi sinfga aylanishi uchun Prezidentning shaxsan oʻzi tadbirkorlar bilan uchrashuvda taklif etgan edi.
"Oʻzbekiston iqtisodiyotining tayanchi boʻlishi kerak boʻlgan kichik biznesning na parlamentda va na biznes manfaatlarini ifoda etishi kerak boʻlgan Savdo-sanoat palatasida vakilligi mavjud. Sudning ahvolini bilasiz. Vazirlar-ku faqat bitib ketgan oligarxlar va monopolistlar bilan gaplashishadi. Kichik biznes kattalarning eshigini qoqib bora olmasa", deb yozgʻirdi bloger.
Eslatib oʻtamiz, mustaqil iqtisodchi mutaxassis Yuliy Yusupov bilan suhbatimizda Soliq qoʻmitasi soliq tushumlari yetishmayotgani bois byudjetda katta defitsit paydo boʻlganini aytgandi. Qoʻmita vakili esa qatʼiy soliq boʻyicha biz bilan kelishilgan suhbatdan qochib ketgan edi.