Toshkentda uy-joy ijarasi narxi tushishi davom etmoqda

Oʻzbekiston poytaxti Toshkentda ijara narxlarining pasayishi kuzatilmoqda. 2024 yilning fevral oyida Toshkent shahrida taklif etilgan uy-joy ijara narxlarini tahlil qilindi.

Toshkent shahrida ijara narxlari pasayishda davom etmoqda. 2024 yil fevral oyida poytaxtda oʻrtacha taʼmirlangan turkumdagi xonadonlar ijara narxlarida yanvar oyiga nisbatan oʻrtacha 0,34%ga, toʻliq taʼmirlangan turkumdagi uy-joylar ijara narxlarida esa oʻrtacha 0.13%ga tushish kuzatildi.

Oʻrtacha taʼmirlangan uy-joy ijarasi. 2024 yil fevral oyida ushbu sinfdagi 1 xonali xonadonlar uchun taklif etilgan ijara narxlari oʻtgan yanvar oyiga nisbatan oʻrtacha 0.3% ga pasayib, 394 dollarni tashkil etgan boʻlsa, 2 xonali xonadonlar ijara narxlari esa 0,2% ga arzonlab, oʻrtacha 441 dollargacha tushdi. Shuningdek, oʻrtacha taʼmirlangan 3 va 4 xonali uylar ijara narxlari 0.4% ga pasayib, oʻrtacha narxlar mos ravishda 514 va 594 dollarni tashkil etdi.

Oʻrtacha taʼmirlangan turkumdagi uylar uchun nisbatan arzon ijara narxlari Sergeli (1 xonali - $358, 2 xonali - $393, 3 xonali - $435, 4 xonali - $450), Olmazor (1 xonali - $357, 2 xonali - $415, 3 xonali - $455, 4 xonali - $490) tumanlarida taklif etilgan boʻlsa, ushbu turkumdagi eng qimmat ijara narxlari Yakkasaroy (1 xonali - $420, 2 xonali - $488, 3 xonali - $657, 4 xonali - $738) va Mirobod (1 xonali - $467, 2 xonali - $520, 3 xonali - $620, 4 xonali - $832) tumanlarida kuzatildi.

Maʼlumot uchun: 2023 yil noyabr oyidan 2024 yil fevral oyigacha boʻlgan davrda oʻrtacha taʼmirlangan 1 va 2 xonali uylar uchun oʻrtacha ijara narxlari mos ravishda 1,8% ($401 dan $394ga) va 2,4%ga ($452 dan $441ga) tushgan.

Toʻliq taʼmirlangan uylar ijara narxlari. Fevral oyida toʻliq taʼmirlangan 1 xonali uylar uchun oʻrtacha ijara narxlari $475 ni tashkil etib, oʻtgan yanvar oyiga nisbatan 0.3%ga tushgan boʻlsa, 2 xonali uylar uchun ushbu koʻrsatkichlar mos ravishda $651 va 0.6% ni tashkil etgan. Shuningdek, 3 xonali uylar uchun taklif etilgan oʻrtacha ijara narxlarida ($790) ham biroz (0,1%) tushish kuzatildi.Lekin, toʻliq taʼmirlangan 4 xonali uylar oʻrtacha ijara narxlari 0.4% oshib, $919 gacha koʻtarilgan.

Toʻliq taʼmirlangan turkumdagi uylar uchun eng arzon ijara narxlari Sergeli (1 xonali - $393, 2 xonali - $462, 3 xonali - $560, 4 xonali - $761) va Uchtepa (1 xonali - $401, 2 xonali - $498, 3 xonali - $617, 4 xonali - $850) tumanlarida hamda ushbu turkumdagi eng qimmat ijara narxlari Shayxontohur (1 xonali - $555, 2 xonali - $848, 3 xonali - $1057, 4 xonali - $1028) va Mirobod (1 xonali - $570, 2 xonali - $861, 3 xonali - $1024, 4 xonali - $1128) tumanlarida kuzatildi.

Eslatib oʻtamiz, 2023 yilning oktabr oyida ham poytaxtda barcha turdagi xonadonlar uchun taklif etilayotgan ijara narxlari oʻtgan yilning mos davridagiga nisbatan arzonlashgan. Oʻshanda narxlar oʻrtacha 6-14 foizgacha tushgandi.