Sherzodxon Qudratxoʻjaning millatparvarligi ruslarga yoqmadi
Jurnalist bloger Kirill Altmanga bergan intervyusida ruslarga qarshi keskin gaplarni gapirdi.
OʻzJOKU rektori Sherzodxon Qudratxoʻja bloger Kirill Altmanga intervyu berdi.
Unda Qudratxoʻja bir mamlakatda yashab turib, uni tilini bilmaydiganlarni "bosqinchi yoki telba" deya atagan.
Shuningdek, Jurnalistika universiteti rektori Amir Temurning Oltin Oʻrdaga yurishi tufayli Rossiya davlati saqlab qolingani va keyinchalik kuchayganini taʼkidlab oʻtgan.
Sherzodxon Qudratxoʻjaning mazkur bayonoti Rossiyada keskin reaksiya berdi. Jumladan "Rossodtrudnichestvo" rahbari Yevgeniy Primakov Qudratxoʻja bilan har qanday aloqalar toʻxtatilishi va uning oʻzi, qarindoshlariga Rossiyaga kirish taqiqlanishini maʼlum qildi.
"U bu soʻzlari uchun uzr soʻrashi kerak" deya yozadi Primakov.
Eslatib oʻtamiz, avvalroq rossiyalik ayrim arboblarning Oʻzbekiston haqidagi gaplari keng munozaralarga sabab boʻlgandi. Jumladan tarixchi Mixail Smolin 1917 yilgacha "oʻzbek xalqi boʻlmagani" haqida iddao qilgan boʻlsa, yozuvchi Zaxar Prilepin "Oʻzbekistonni Rossiyaga qoʻshib olish" haqida gapirgandi. Prilepinning soʻzlaridan keyin Rossiya elchisi Oʻzbekiston TIVga chaqirtirilgandi.