Pokiston sobiq bosh vaziri yana 10 yilga "kesildi"
Sud qarori saylovlar arafasida chiqarildi, endi Xon ularda qatnasha olmaydi.
Pokiston sudi seshanba kuni sobiq bosh vazir Imron Xonni davlat sirlarini oshkor qilganlikda ayblab, 10 yillik qamoq jazosiga hukm qildi. Bu haqda BBC xabar bermoqda.
Ayblov xulosasiga koʻra, Xon Pokistonning Vashingtondagi elchisining hukumatga yuborgan maxfiy telegramma mazmunini oshkor qilgan.
Sobiq bosh vazirning partiyasi bu ayblovni uydirma deb hisoblaydi va hukmga eʼtiroz bildirmoqchi, deb xabar bermoqda Reuters.
2022 yilda bosh vazirlik lavozimidan chetlatilgan Xon, avvalroq korrupsiyada ayblanib, uch yillik qamoq jazosiga hukm qilingan. Hukm 2023 yil avgustida chiqarilgan.
Endi yangi hukm umumiy saylovlarga bir hafta qolganida eʼlon qilindi, endi Imron Xonning saylovda qatnashishi taqiqlanadi. Xon oʻziga qoʻyilgan barcha ayblovlarni siyosiylashtirilgan deb ataydi.
Taʼkidlash joiz, 2023 yil avgustda Xon oʻz lavozimida boʻlgan vaqtida chet el rahbarlaridan olingan sovgʻalarni sotishda ayblanganib, uch yil qamoqqa hukm qilingandi.
Imron Xonning may oyida boshqa holatda hibsga olinishi sobiq bosh vazir tarafdorlari va politsiya oʻrtasida tartibsizliklar va shiddatli toʻqnashuvlarga olib kelgandi.
Oʻshanda u yer bilan bogʻliq firibgarliklarga aloqador deb topilib, qamoqqa olingandi. Namoyishlardan soʻng Imron Xon garov evaziga ozod etilgandi.