Portlash boʻyicha komissiya tuzildi
Komissiya favqulodda holatni oʻrganib, koʻrilgan talafotlarni bartaraf etish va jabrlanganlarga yordam koʻrsatish bilan shugʻullanadi.
Sergeli tumani "Quruvchilar" dahasida joylashgan omborxonada sodir boʻlgan portlash boʻyicha hukumat komissiyasi tuzildi. Bu haqda bosh vazir matbuot kotibi maʼlum qildi.
Bosh vazir oʻrinbosari Ochilboy Ramatov boshchiligida hukumat komissiyasi favqulodda holatni oʻrganib, koʻrilgan talafotlarni bartaraf etish va jabrlanganlarga yordam koʻrsatish bilan shugʻullanadi.
Bu boʻyicha prezident Shavkat Mirziyoyev topshiriq berdi. Komissiya hududda olib borayotgan ishlar yuzasidan axborot berib boriladi.
Eslatib oʻtamiz, bugun kechasi Sergelidagi omborda kuchli portlash boʻlgan, holatni oʻrganish uchun voqea joyiga bosh vazir va boshqa masʼullar yetib borgan.
Hozircha bitta qurbon — oʻsmir bola deraza oynasi bosib qolishi oqibatida vafot etgani tasdiqlandi. Boshqa qurbonlar soni aniqlashtirilmoqda.