Antistrumin dorisi bilan bogʻliq shubhali shartnomalar
“Samo” MChJ bilan bir necha milliard soʻmlik bir nechta shartnomalar imzolangan
Sogʻliqni saqlash vazirligi taʼsischiligidagi “O‘ZMEDIMPEKS” MChJ kaliy yodid 1 mg (0,001 g) №100 (Antistrumin) dorisini xarid qilish uchun “Samo” MChJ bilan bir necha milliard soʻmlik bir nechta shartnomalar imzolagan. Bunga Telegramdagi @pressuzb kanali eʼtibor qaratdi.
Aytilishicha, 2022 yil iyun oyida “Samo” MChJ bilan 5 mlrd. 644 mln. soʻmlik toʻgʻridan-toʻgʻri shartnoma tuzilgan. 2023 yil 11 yanvarda esa ushbu shartnomaga 956 mln. soʻmlik qoʻshimcha kelishuv imzolangan.
“O‘ZMEDIMPEKS” MChJ 2023 yil 4 mayda yana antistrumin dori vositasini xarid qilish uchun “Samo” MChJ bilan 15 mlrd. 275 mln. soʻmlik toʻgʻridan-toʻgʻri shartnoma tuzgan. Ushbu shartnomalarga koʻra, jami 21 mlrd. 875 mln. soʻm evaziga “Samo” MChJ 3 mln. 550 ming qadoqda antistrumin yetkazib berishi koʻrsatilgan.
Antistrumin xarid qilish uchun hech qanday tender oʻtkazilmagan, shartnomalar toʻgʻridan-toʻgʻri tuzilgan. “Samo” MChJ taʼsischilaridan biri Nodir Yunusov AQSh bojxona va immigratsiya nazorati xizmati tomonidan qidiruvga berilgani haqida xabar bergandik. U odam savdosi va firibgarlikda ayblangan.
Nodir Yunusov, shuningdek, “Zuma-Pharma” MChJ rahbari ham sanaladi. Davlat xaridlari portalida “O‘ZMEDIMPEKS” MChJ “Zuma-Pharma” MChJ bilan ham tuzgan shartnomalar haqida maʼlumot bor. Jumladan, 7000 dona shprits-ruchka eritropoetin vositasini yetkazib berish boʻyicha 782 mln. soʻmlik toʻgʻridan-toʻgʻri shartnoma tuzilgan.