Andijonda ham zaharlanish aniqlandi
Viloyat hokimligi avvaliga ushbu xabarlarni rad etdi, keyinroq esa hokim bemor bolalarni koʻrgani bordi
Respublika shoshilinch tibbiy yordam markazi Andijon filialida ham zaharlangan bolalar borligi maʼlum boʻldi. Ularning soni hozircha 12 nafar.
Avvaliga viloyat hokimligi axborot xizmati bu holatni rad etib, "koʻp sonli zaharlanish holati yoki butun boshli biror muassasa tarbiyalanuvchilari zaharlangan holat hozirda viloyatimizda yoʻq", deya bayonot berdi.
Ammo keyinchalik viloyat hokimi Shuhrat Abdurahmonov bolalarni koʻrishga bordi. Aytilishicha, hokim dorining nojoʻya taʼsiri oqibatida shifoxonaga kelgan barcha ota-onalar va bolalar bilan gaplashgan.
"Shifxonamizga kelgan 12 bolaning salomatligi yaxshilanib, uylariga ketishga ruhsat bera boshladik", degan toksikologiya boʻlimi shifokori Murod Imomberdiyev.
Marhamat tumanida isitma va koʻngil aynishi bilan (ota-onalari) murojaat qilgan bolalar soni 4 nafar boʻlib, ularning holati hozirda qoniqarli holatda.
Avvalroq Namanganning Chust tumanida yoddan ommaviy zaharlangan bolalar katta shov-shuv boʻlgandi. Buni hatto prezident ham eʼtiborga olib, vaziyat nazoratda ekanini bildirgan.