102 emas: ichki ishlarning tezkor raqami oʻzgaryapti
Viloyat va tuman ichki ishlar rahbarlari har oyda kamida bir marta tuman va shahar kengashlariga jinoyatchilik boʻyicha hisobot beradi.
Prezident oʻtkazayotgan yigʻilishda Ichki ishlar va Raqamli texnologiyalar vazirliklari oldiga aholining barcha tezkor va shoshilinch xizmatlarga murojaatlarini operativ hal qilish maqsadida yagona “112” tezkor raqami va dispetcherlik tizimini ishga tushirish vazifasi qoʻyildi.
Ichki ishlar va Raqamli texnologiyalar vazirliklariga ikki oy muddatda har bir viloyat-tuman-mahalla kesimida ijtimoiy va kriminogen muammolarni raqamlashtirish orqali “Ijtimoiy vaziyat” axborot tizimini ishga tushirish topshirildi.
Bunda, aholi noroziligiga sabab boʻlayotgan ijtimoiy muammolarning yagona reyestri shakllantiriladi, masʼul idoralarning kuchi muammoga qarab manzilli yoʻnaltiriladi.
Bundan buyon viloyat va tuman ichki ishlar rahbarlari har oyda kamida bir marta tuman va shahar kengashlariga jinoyatchilik ahvoli boʻyicha hisobot berishi belgilandi.
Ushbu tizim 2024 yil 1 yanvardan Toshkent shahrida, 1 iyulga qadar vodiy viloyatlarida, kelasi yil yakuniga qadar esa barcha tuman va shaharlarda ishga tushirilishi shart.
Shu orqali navbatchilik qismlari faoliyati ham tubdan qayta koʻrib chiqiladi, deyiladi xabarda.
Avvalroq, IIV rahbarining oʻrinbosari ishdan olingani maʼlum boʻlgandi.