IIV xalqaro qidiruvdagi Nodir Yunusov haqida maʼlumot berishni istamayapti
Ushbu maʼlumotga oydinlik kiritish maqsadida muxbirimiz Ichki ishlar vaziri matbuot kotibi Shohruh Gʻiyosov bilan bogʻlandi.
“Antistrumin” dorisini ishlab chiqargan “SAMO” MChJ korxonasi rahbari Nodir Yunusov AQSh bojxona va immigratsiya nazorati xizmati tomonidan qidiruvga berilgani, odam savdosi va firibgarlikda ayblangani haqida xabar bergandik.
Ushbu maʼlumotga oydinlik kiritish maqsadida muxbirimiz Ichki ishlar vaziri matbuot kotibi Shohruh Gʻiyosov bilan bogʻlanganida Interpolga rasmiy soʻrov yuborish kerakligini bildirdi.
Platina.uz sayti Nodir Yunusovga oid xabarga aniqlik kiritish maqsadida 26 sentabr kuni "Interpol"ning Oʻzbekistondagi Milliy markaziy byurosi boshligʻi, general-mayor Sh.Sobirovga rasmiy xat bilan soʻrov yubordi.
Soʻrovimizga bir kunda javob oldik. Lekin Interpoldan emas. 27 sentabr kuni Ichki ishlar vaziri matbuot kotibi Sh.Gʻiyosov imzosi bilan kelgan javobda maʼlumotlarni "Interpol va ichki ishlar organlarining rasmiy manbalari orqali olish mumkinligi" aytilgan.
Ommaviy axborot vositasiga nisbatan "onangga bor, otangga bor" qabilidagi bu munosabatning Ichki ishlar vaziri matbuot kotibi imzosi bilan bildirilishini tizimda ochiqlik va shaffoflikka darz ketganiga ishora deb qabul qilamiz.