Qirgʻiziston Oʻzbekistonga rekord miqdorda un eksport qildi
Avvalroq, qirgʻizistonlik deputat un tanqisligiga Oʻzbekistonni sabab qilib koʻrsatgandi.
Qirgʻiziston joriy yilning 7 oyida 1,5 ming tonna un eksport qildi, deb xabar bermoqda Qirgʻiziston Milliy statistika qoʻmitasi. Qolaversa, eksportning hammasi Oʻzbekistonga yoʻnaltirilgan. Bu avvalgi davrlarga qaraganda ancha koʻp miqdor sanaladi.
Shu bilan birga, un importi shu davrda 3,3 ming tonnaga qisqarib, 16,2 ming tonnani tashkil etdi.
Ayni damda Qirgʻizistonda un narxi keskin koʻtarilib, tanqislik muammosi yuzaga kelgan.
Ayrim rasmiylarga koʻra, bunga qoʻshni Oʻzbekistonga mahsulotlarning nazoratsiz yetkazib berilishi sabab boʻlmoqda.
Shu bois Monopoliyaga qarshi davlat qoʻmitasi hukumatga un eksportiga vaqtinchalik cheklov joriy etishni taklif qildi.
Qirgʻiziston hukumatining aniqlik kiritishicha, narxlarning oshishiga faqat Qozogʻistondan olib kelingan un taʼsir koʻrsatgan, chunki temir yoʻllardagi tirbandlik tufayli yetkazib berish toʻxtatilgan.
Avvalroq qirgʻizistonlik deputat Jusupbek Korgonbay oʻgʻli mamlakatda un narxi mahsulot Oʻzbekistonga eksport qilinayotgani tufayli koʻtarilayotganini aytgandi.