Sirdaryoda koʻprik oʻpirilib tushdi
Avgust oyida Toshkentda xalqaro aeroportga olib boruvchi yoʻl oʻtkazgichi qulab tushgandi.
Oqoltin tumanidan oʻtuvchi avtomobil yoʻlida joylashgan zovur koʻprigining "Toshkent-Jizzax" yoʻnalishidagi qismida oraliq qurilma balkalarining 5 tasida yoriq vujudga kelib, choʻkish hosil boʻlgan.
Shu munosabat bilan "Toshkent-Termiz" yoʻnalishidagi barcha avtotransport vositalari harakati vaqtincha cheklandi, deya xabar bermoqda Sirdaryo viloyati hokimligi. Ushbu yoʻnalishdagi avtomobillar harakati boshqa yoʻnalishlarga koʻchirilgan.
Barcha yoʻnalishlarda YPX postlari tashkil qilinib, harakat xavfsizligini toʻliq taʼminlash choralari koʻrilgan.
Ayni vaqtda mazkur koʻprikda taʼmirlash-tiklash ishlari olib borilmoqda, deyiladi xabarda.
Eslatib oʻtamiz, joriy yilning avgust oyida Toshkentda xalqaro aeroportga olib boruvchi yoʻl oʻtkazgichi qulab tushgan va uch mansabdor qoʻlga olingandi.