Endi navbat pomidorgami?

Oʻzbekistonda oʻtgan haftada qizil dumaloq pomidorning oʻrtacha ulgurji narxi 29 foizga va oʻtgan yilga nisbatan deyarli 2 baravarga oshdi. Bu haqda EastFruit portali xabar berdi.

Shuningdek, 2023 yilning 17 martidan 24 martigacha Oʻzbekistonda qizil dumaloq issiqxona pomidorining oʻrtacha ulgurji narxi 28 ming soʻmdan 36 ming soʻm/kg ga (2,45 dan 3,16 dollarga), bir hafta ichida 28,6 foizga oshgan. Oxirgi uch oyda ushbu mahsulotlarning jadal oʻsishi hisobga olinsa, yil boshidan 24 martgacha Oʻzbekistonda qizil dumaloq pomidorning ulgurji narxlari 2,4 barobarga oshgan.

24 mart holatiga koʻra, mamlakatlarda qizil dumaloq issiqxona pomidorining oʻrtacha ulgurji narxi quyidagi koʻrsatkichni tashkil etgan (1 kg uchun AQSh dollarida):

• Oʻzbekiston — $3,16;
• Polsha — $2,79;
• Ukraina — $2,60;
• Tojikiston — $2,29;
• Moldova — $1,61;
• Gruziya — $1,16.

Eslatib oʻtamiz, Oʻzbekistonda kuzatilgan anomal sovuq sabab piyoz narxi koʻtarilib ketgani haqida maʼlumot bergandik.