Saida Mirziyoyevani ranjitgan masalaga deputatlar jim qarab turmadi
Oʻzbekiston Respublikasining Maʼmuriy javobgarlik toʻgʻrisidagi kodeksga pedagoglarni mehnatga maʼmuriy tarzda majburlash — bazaviy hisoblash miqdorining yuz baravaridan bir yuz ellik baravarigacha miqdorda jarima solishga sabab boʻlishi; taʼlim muassasasi pedagog xodimining kasbiy faoliyatiga taʼlim oluvchilar bilimini toʻgʻri va xolis baholashiga taʼsir koʻrsatish bilan ifodalangan tarzda qonunga xilof ravishda aralashish yoki taʼlim muassasasi pedagog xodimining xizmat vazifalarini bajarishiga toʻsqinlik qilish — fuqarolarga bazaviy hisoblash miqdorining yetti baravaridan oʻn baravarigacha, mansabdor shaxslarga esa – oʻn baravaridan oʻn besh baravarigacha miqdorda jarima solishga sabab boʻlishi;(Amaldagi qonunchilikda ushbu huquqbuzarlikka nisbatan belgilangan jarimalar miqdori fuqarolarga BHMning 5 baravaridan 7 baravarigacha, mansabdor shaxslarga esa – 7 baravaridan 10 baravarigacha miqdorni tashkil etadi).
xuddi shunday huquqbuzarliklar maʼmuriy jazo chorasi qoʻllanilganidan keyin bir yil davomida takror sodir etilgan boʻlsa, — fuqarolarga bazaviy hisoblash miqdorining oʻn baravaridan oʻn besh baravarigacha, mansabdor shaxslarga esa – oʻn besh baravaridan yigirma baravarigacha miqdorda jarima solishga yoki oʻn besh sutkagacha muddatga maʼmuriy qamoqqa olishga sabab boʻlishini nazarda tutuvchi normani kiritish nazarda tutilgan.(Amaldagi qonunchilikka koʻra, fuqarolarga bazaviy hisoblash miqdorining 7 baravaridan 10 baravarigacha, mansabdor shaxslarga esa — 10 baravaridan 15 baravarigacha miqdorda jarima solishga sabab boʻladi. Maʼmuriy qamoqqa olish bilan bogʻliq jazo chorasi mavjud emas). Shuningdek, Jinoyat Kodeksiga ham taʼlim muassasasining pedagog xodimiga nisbatan mehnatga maʼmuriy tarzda majburlash uchun maʼmuriy jazo qoʻllanilganidan keyin sodir etgan taqdirda huquqbuzar bazaviy hisoblash miqdorining bir yuz ellik baravaridan ikki yuz baravarigacha miqdorda jarima yoki uch yilgacha muayyan huquqdan mahrum qilish yoki uch yilgacha axloq tuzatish ishlari bilan jazolanishini mustahkamlovchi yangi norma qoʻshish taklif etilgan. Qonun loyihasi tashabbuskorlarining izohlashicha, taklif etilgan qonun loyihasi bilan kiritilgan oʻzgartish va qoʻshimchalar oʻqituvchilarning ish samaradorligini oshirish, lavozim majburiyatiga kirmaydigan vazifalarga jalb etish jarayonlariga barham berish uchun juda muhim. “Milliy tiklanish” demokratik partiyasi fraksiyasi rahbari Alisher Qodirovning qayd etishicha, Yangi Oʻzbekiston islohotlarining eng katta muvaffaqiyatlaridan biri shubhasiz, pedagoglarni paxta dalasiga jalb qilishni butunlay cheklanganidir. — Lekin majburiy mehnatning ayrim koʻrinishlari hamon saqlanib turibdi. Shu bois, ushbu qonun loyihasi bilan jazo choralari yanada kuchaytirilmoqda va partiyamiz bunday qonun loyihalarini soʻzsiz qoʻllab-quvvatlaydi. Zotan, pedagogikaga qilingan xiyonat — mamlakat kelajagiga qilingan xiyonatdir, – deydi u. Darvoqe, Saida Mirziyoyeva ham mazkur masalada muhim chaqiriq bilan chiqqani haqida yozgandik. Qonunchilik palatasining yalpi majlisida mazkur qonun loyihasining birinchi oʻqishdayoq qabul qilinishi esa Saida Mirziyoyevani ranjitgan masalaga deputatlar ham jim qarab turmaganidan dalolatdir.
