ИИБ ходимлари споттерларни ноқонуний ушлагани маълум бўлди

Ижтимоий тармоқларда ёш споттерларнинг қўлга олингани ҳақида хабарлар тарқалди. 2022 йил 26 январда Вазирлар Маҳкамасининг “Ависпоттингни ривожлантириш учун шарт-шароитлар яратиш чора-тадбирлари тўғрисида”ги қарори билан Ўзбекистонда споттинг ҳаракати расман қонунийлаштирилган.

Воқеа Тошкент шаҳрининг Сергели туманидаги Қумариқ маҳалласида содир бўлган. Болалар ҳаво бандаргоҳи чегараларини бузмаган ҳолда Тошкент халқаро аэропорти панжараси ортида туриб самолётларни суратга олган.

Uzbekistan Airports хабарига кўра, компания Ўзбекистондаги споттинг ҳаракатини қўллаб-қувватлайди ва ёш авлод ушбу ҳобби билан шуғулланишига тўсқинлик қилмайди.

Компания йил бошидан буён Тошкент аэропорти ҳудудида 30 га яқин режали ва режадан ташқари споттинг-турлар ташкил этилганини таъкидлади.