Yashnobodda 2,4 mlrd soʻmlik yashirin koll-markaz fosh etildi
Gumonlanuvchilar Yevropa mamlakatlari fuqarolariga soxta hujjatlar tayyorlash hamda kriptoaktivlar bilan ishlash boʻyicha taʼlim berish xizmatlarini taklif qilgan.

Yashnobod tumanidagi xonadonlardan birida faoliyat yuritgan yashirin koll-markaz aniqlandi.
Toshkent shahar IIBB maʼlumotiga koʻra, guruh aʼzolari Yashnobod tumanidagi xonadonda yashirin ravishda koll-markaz tashkil etib, oʻz faoliyatini olib borgan.
Gumonlanuvchilar Yevropa mamlakatlari fuqarolariga soxta hujjatlar tayyorlash hamda kriptoaktivlar bilan ishlash boʻyicha taʼlim berish xizmatlarini taklif qilgan. Ular ushbu takliflar orqali xorijiy fuqarolarni aldash va mablagʻlarini qoʻlga kiritishda gumon qilinmoqda.
Xabarda mazkur faoliyat bilan bogʻliq kriptoaktivlar aylanmasi 2,4 mlrd soʻmni tashkil etgani qayd etilgan.
Holatga 10 kishidan iborat guruh aloqador ekani bildirilmoqda. Ular oʻz faoliyatini oddiy turar joyda tashkil etilgan koll-markaz orqali amalga oshirgan.




