Janubiy Koreyada 10 yil ichida ilk marta vabo kasalligi qayd etildi
Tibbiyot xodimlari hozirda infeksiya manbasini va bemor kim bilan aloqada boʻlganini aniqlashga harakat qilmoqdalar.

Janubiy Koreyada 10 yil ichida birinchi marta vabo kasalligi qayd etildi, deb xabar berdi Associated Press.
Koreya Kasalliklarni nazorat qilish va oldini olish agentligi sogʻliqni saqlash rasmiylari vabo kasalligi holatini tasdiqlaganini maʼlum qildi.
Noyabr oyi boshida bir bemor janubi-sharqdagi Changvon port shahridagi shifoxonaning tez yordam boʻlimiga murojaat qilgan edi. Bemor seshanba kuni tuzalib, oʻshanda uyiga javob yuborilgan.
Tibbiyot xodimlari hozirda infeksiya manbasini va bemor kim bilan aloqada boʻlganini aniqlashga harakat qilmoqdalar.
Janubiy Koreyada vabo kasalligining soʻnggi uchta holati 2016 yilda, dengiz mahsulotlarini isteʼmol qilgan kishilar orasida qayd etilgan.
Eslatib oʻtamiz, oktabr oyi boshida Rossiyaning Irkutsk shahrida oʻlat sabab bir kishi vafot etgani boʻyicha xabarlar tarqalgandi.





