Turk farmatsevtika kompaniyalari uchun alohida sanoat zonasi tashkil etiladi
2002 yildan buyon mamlakatimizda faoliyat yuritayotgan "Nobel Pharmsanoat" kompaniyasi tajribasi sohadagi hamkorlikning amaliy namunasi sifatida koʻrsatildi.

Mamlakatimizda tibbiy mahsulotlar ishlab chiqarishni mahalliylashtirishga alohida eʼtibor qaratilmoqda.
Buning uchun Toshkent farmatsevtika parkida investorlarga keng qamrovli imtiyoz va preferensiyalar, zarur infratuzilma hamda ishlab chiqarish maydonlari taqdim etilmoqda.
Prezidentimiz turk farmatsevtika kompaniyalari uchun alohida sanoat zonasini tashkil etish tashabbusini ilgari surdi.
2002 yildan buyon mamlakatimizda faoliyat yuritayotgan "Nobel Pharmsanoat" kompaniyasi tajribasi sohadagi hamkorlikning amaliy namunasi sifatida koʻrsatildi.
Turkiyaning boshqa yetakchi farmatsevtika kompaniyalari ham ushbu yoʻnalishda faol hamkorlikka taklif qilindi.
Oʻzbekistonda xususiylashtirish va davlat-xususiy sheriklik dasturlari Turkiya investorlari uchun yangi imkoniyatlar ochmoqda.
Prezidentimiz taʼkidlaganidek, 2026–2027 yillarda umumiy qiymati 8,4 milliard dollarlik davlat aktivlari, koʻchmas mulk obʼektlari va yer maydonlarini savdoga chiqarish rejalashtirilgan.
Turk kompaniyalari bilan Samarqand avtomobil zavodini xususiylashtirish, Samarqand viloyati elektr tarmoqlarini modernizatsiya qilish va Buxoroda yangi xalqaro aeroport qurish kabi yirik tashabbuslar boʻyicha hamkorlik olib borilmoqda.
Davlatimiz rahbari Turkiya banklari, investitsiya fondlari va sanoat kompaniyalarini ushbu jarayonlarda yanada faol ishtirok etishga chorladi.





