Toshkentda qarovsiz hayvonlar va qushlarning ommaviy nobud boʻlishi kuzatildi
Poytaxt hokimligi zaharli moddalar qoʻllangan boʻlishi ehtimoli ortidan aholi xavfsizligiga alohida eʼtibor qaratilishini maʼlum qilgan. Fuqarolardan nobud boʻlgan hayvonlar topilgan aniq manzillarni, shuningdek, hodisa tafsilotlarini aniqlashga yordam beradigan har qanday maʼlumotni maʼlum qilish soʻralgan.

Ijtimoiy tarmoqlarda Uchtepa tumani Chilonzor-26 mavzesi hududida qarovsiz hayvonlar va qushlarning ommaviy nobud boʻlayotgani haqida xabarlar tarqaldi. Aholi bunga qasddan zaharlash sabab boʻlganini taxmin qilgan. Tuman hokimligi holat yuzasidan rasmiy munosabat bildirdi.
Maʼlum qilinishicha, vaziyat tuman hokimligi nazoratiga olingan.
“Masʼul xizmatlar bilan birgalikda hodisa tafsilotlari tegishli tartibda qayd etilgach, hududni koʻzdan kechirish hamda nobud boʻlgan hayvonlar va qushlarni yigʻishtirib olish ishlari tashkil etilmoqda.
Hayvonlar oʻlimi sabablarini aniqlash uchun vakolatli xizmatlar va huquqni muhofaza qiluvchi organlar jalb etiladi. Qonunga xilof harakatlar sodir etilgani oʻz tasdigʻini topsa, aybdorlar qonunda belgilangan tartibda javobgarlikka tortilishi shart”, deyiladi munosabatda.
Hokimlik zaharli moddalar qoʻllangan boʻlishi ehtimoli ortidan aholi xavfsizligiga alohida eʼtibor qaratilishini maʼlum qilgan. Fuqarolardan nobud boʻlgan hayvonlar topilgan aniq manzillarni, shuningdek, hodisa tafsilotlarini aniqlashga yordam beradigan har qanday maʼlumotni maʼlum qilish soʻralgan.
Shuningdek, vaziyatga toʻliq oydinlik kiritilgunga qadar shubhali moddalarga qoʻl tekkizmaslik, bolalar va uy hayvonlarini ularga yaqinlashtirmaslik tavsiya qilingan.
Hokimlik kelib tushgan maʼlumotlar yuzasidan chuqur afsusda ekanini, hayvonlarga nisbatan har qanday shafqatsizlik koʻrinishlari qatʼiy qoralanishini qoʻshimcha qilgan.





