Chilonzorda Nexia daraxtga urilib, boʻlinib ketdi: uch kishi halok boʻldi
Avtomobilni 18 yashar fuqaro boshqargan. Dastlabki maʼlumotga koʻra, YTHga avtoulov rul boshqaruvida vujudga kelgan texnik nosozlik sabab boʻlgan.

16 noyabr kuni tongda Toshkent shahrining Chilonzor tumanida Nexia-3 yoʻl chetidagi daraxtga urilib, boʻlinib ketdi. Hodisa oqibatida 3 kishi halok boʻldi. Bu haqda poytaxt Yoʻl harakati xavfsizligi boshqarmasi xabar berdi.
Qayd etilishicha, soat 04:50 larda Chilonzor tumani Bunyodkor shox koʻchasida Nexia-3 rusumli avtotransport vositasini boshqarib ketayotgan 2008 yilda tugʻilgan T.A ismli haydovchi rul boshqaruvini yoʻqotgan. Oqibatda avtomobil yoʻl chetidagi daraxtga borib urilib, YTH sodir etgan. Dastlabki maʼlumotga koʻra, YTHga avtoulov rul boshqaruvida vujudga kelgan texnik nosozlik sabab boʻlgan.
Hodisa oqibatida haydovchi va uning yonida boʻlgan 2 nafar yoʻlovchi shifoxonada vafot etgan.
Bildirilishicha, hozirda mazkur holat yuzasidan Toshkent shahar IIBB Tergov boshqarmasi masʼul xodimlari tomonidan Jinoyat kodeksining 266-moddasi tegishli qismi bilan jinoyat ishi qoʻzgʻatilib, dastlabki tergov harakatlari olib borilmoqda.





