Rossiyada oʻzbekistonlik ayolning jasadi chamadon ichidan topildi
Aytilishicha, ayol va uning oʻgʻli oʻrtasida janjal kelib chiqqan. Bunga onasining oʻsmirga veyp, yaʼni elektron sigareta chekishni taqiqlagani sabab boʻlgani aytilmoqda. Oʻsmir janjaldan soʻng onasini oʻldirgan, jasadini chamadonga joylashtirib, oʻrmonzor hududga olib borib tashlaganlikda gumonlanmoqda.
Rossiyaning Sankt-Peterburg shahri Viborg tumaniga qarashli Pargolovo posyolkasida Oʻzbekistonda tugʻilgan ayolning jasadi chamadon ichidan topildi. Bu haqda RIA Novosti xabar berdi.
Rossiya Tergov qoʻmitasining Sankt-Peterburg shahri boʻyicha boshqarmasi maʼlumotiga koʻra, mazkur jinoyatni sodir etishda gumonlanib, marhumaning 15 yoshli oʻgʻli qoʻlga olingan.
Rossiya ommaviy axborot vositalari tarqatgan maʼlumotlarga koʻra, 2 noyabr kuni Yukkovskoye shossesidagi xonadonda 38 yoshli ayol va uning oʻgʻli oʻrtasida janjal kelib chiqqan. Bunga onasining oʻsmirga veyp, yaʼni elektron sigareta chekishni taqiqlagani sabab boʻlgani aytilmoqda.
Dastlabki xabarlarga koʻra, oʻsmir janjaldan soʻng onasini oʻldirgan, jasadini chemodanga joylashtirib, oʻrmonzor hududga olib borib tashlaganlikda gumonlanmoqda.
Maʼlum qilinishicha, marhuma Oʻzbekistonda tugʻilgan boʻlib, Sankt-Peterburgda farrosh boʻlib ishlagan. Uni oxirgi marta 1 noyabr kuni ish joyida koʻrishgan. Shundan soʻng ayol telefon qoʻngʻiroqlariga javob bermay qoʻygan, biroq qarindoshlari bilan yozishmalar davom etgan.
Mazkur xabarlar ayolning singlisida shubha uygʻotgan va u 11 noyabr kuni politsiyaga murojaat qilgan.
Holat yuzasidan Rossiya Federatsiyasi Jinoyat kodeksining 105-moddasi 1-qismi (qasddan odam oʻldirish) bilan jinoyat ishi qoʻzgʻatilgan.
Ayni paytda gumonlanuvchi oʻsmirga nisbatan ehtiyot chorasini tanlash masalasi koʻrib chiqilmoqda. Tergov harakatlari davom etmoqda.
