Qibraydagi reabilitatsiya markazida bolalarga devor yuvdirildi
Sogʻliqni saqlash vazirligi bolalar xoʻjalik ishlari boʻyicha mudiraning qarori bilan tozalash ishlariga jalb qilinganini maʼlum qildi. Aybdor xodimlarga nisbatan choralar koʻrilishini maʼlum qilindi.
12 noyabr kuni ijtimoiy tarmoqlarda Toshkent viloyati Qibray tumanidagi Respublika bolalar tibbiy reabilitatsiya markazida bemor bolalar va oʻsmirlar devorlarni yuvayotgani aks etgan video tarqaldi.
Bolalar ombudsmani Surayyo Rahmonova holatni nazoratga oldi. Uning Toshkent viloyati boʻyicha vakili tekshiruv oʻtkazish uchun voqea joyiga bordi.
Oʻzbekiston Sogʻliqni saqlash vazirligi bolalar xoʻjalik ishlari boʻyicha mudiraning qarori bilan tozalash ishlariga jalb qilinganini maʼlum qildi.
Xizmat tekshiruvining dastlabki natijalariga koʻra, 11 noyabr kuni boʻlimning xoʻjalik ishlari boʻyicha hamshirasi M. A. soat 7:20 da ishga kelgan va tozalikni tekshirayotganida yoʻlak devorlarida oyoq izlarini aniqlagan. Shundan soʻng iz qoldirgan bolalar devorlarni yuvishga jalb qilingan.
Sogʻliqni saqlash vazirligi ishchi guruh tekshiruvi yakunlariga koʻra, aybdor xodimlarga nisbatan choralar koʻrilishini bildirdi.
Reabilitatsiya markazi mart oyida ish boshlagan. Unda asab tizimi kasalliklari, ortopedik buzilishlar, nafas yoʻllari va oshqozon-ichak trakti kasalliklari boʻlgan 18 yoshgacha bolalarga reabilitatsiya xizmatlari koʻrsatiladi.
