Oʻzbekiston turkiyalik daʼvogarlar bilan arbitraj ishida gʻalaba qozondi
Ushbu investitsiyaviy nizo 1992 yilda tuzilgan bitimga asoslangan boʻlib, 2021 yil iyun oyida boshlanib, 5 yil davom etdi.
Oʻzbekiston Respublikasi xalqaro investitsiyaviy arbitraj ishida gʻalaba qozondi.
2026 yil 26 oktabr kuni Investitsiyaviy nizolarni hal etish boʻyicha xalqaro markaz (ICSID) arbitraj tribunali Turkiya fuqarosi Mehmet Zeki Obuz va boshqalarning Oʻzbekiston Respublikasiga qarshi qoʻzgʻatgan xalqaro arbitraj ishi yuzasidan qaror qabul qildi.
Qarorga muvofiq, daʼvogarlar tomonidan Oʻzbekiston Respublikasiga qarshi ilgari surilgan barcha daʼvo talablari rad etildi.
Ushbu investitsiyaviy nizo Oʻzbekiston Respublikasi va Turkiya Respublikasi oʻrtasida 1992 yilda tuzilgan investitsiyalarni oʻzaro ragʻbatlantirish va himoya qilish toʻgʻrisidagi ikki tomonlama bitim asosida qoʻzgʻatilgan boʻlib, 2021 yil iyun oyida boshlanib, 5 yil davom etdi.
Arbitraj tribunali eʼlon qilgan qaror nizolashuvchi tomonlar uchun yakuniy hisoblanadi.
Mazkur arbitraj ishida davlat manfaatlarini Oʻzbekiston Respublikasi Adliya vazirligi hamda “Curtis, Mallet-Prevost, Colt & Mosle” xalqaro yuridik kompaniyasi (AQSh) himoya qildi.
