Begona qizni haqorat qilgan bloger Feruza Normatovaga nisbatan jinoyat ishi qoʻzgʻatildi
Mirobod tumanida yashovchi qiz ichki ishlar organlariga murojaat qilib, ijtimoiy tarmoqda uning suratidan ruxsatsiz foydalanilganini bildirgan.Normatova esa suratdagi qizni umuman tanimasligini, bu ishni shunchaki piar qilish va obunachilari sonini oshirish maqsadida amalga oshirganini tan olgan.
Toshkent shahrining Mirobod tumanida ijtimoiy tarmoq orqali begona qizga nisbatan asossiz ayblovlar bildirib, uni haqorat qilgan bloger Feruza Normatovaga nisbatan jinoyat ishi qoʻzgʻatildi.
Bu haqda poytaxt IIBB matbuot xizmati xabar berdi.
Mirobod tumanida yashovchi qiz ichki ishlar organlariga murojaat qilib, ijtimoiy tarmoqda uning suratidan ruxsatsiz foydalanilganini bildirgan.
Bloger oʻziga notanish qizning suratini ijtimoiy tarmoqdagi sahifasiga joylashtirib, uni turmush oʻrtogʻi bilan munosabatda boʻlishda ayblagan. Shuningdek, videoda qizga nisbatan haqoratli fikrlar bildirgan.
Murojaat qilgan fuqaroning taʼkidlashicha, u mazkur blogerni ham, uning turmush oʻrtogʻini ham shaxsan tanimaydi va ular bilan hech qanday aloqasi boʻlmagan.
Qizning soʻzlariga koʻra, uning surati joylashtirilgan video ayolning ijtimoiy tarmoqdagi stories’ida 24 soat davomida turgan va uni 4 milliondan ortiq kishi koʻrgan. Keyinchalik video boshqa foydalanuvchilar tomonidan ham tarqatilgan.
Holatga oydinlik kiritish maqsadida ijtimoiy tarmoqdagi sahifa egasidan izoh soʻralgan. U suratdagi qizni umuman tanimasligini, bu ishni shunchaki piar qilish va obunachilari sonini oshirish maqsadida amalga oshirganini tan olgan.
Mazkur holat yuzasidan Mirobod tumani Ichki ishlar organlari faoliyatini muvofiqlashtirish boshqarmasi tergov boʻlimi tomonidan ayolga nisbatan Jinoyat kodeksining 140-moddasi 2-qismi (haqorat qilish) bilan jinoyat ishi qoʻzgʻatilgan.
