Qoʻqondagi mehmonxonada 13 yoshli qiz zoʻrlandi
Holat yuzasidan Qoʻqon shahar prokuraturasi tomonidan Jinoyat kodeksining 128-moddasi 3-qismi "a" bandi bilan jinoyat ishi qoʻzgʻatilgan. Gumonlanuvchi qamoqqa olindi.
Ijtimoiy tarmoqlarda Qoʻqon shahridagi mehmonxonada 13 yoshli voyaga yetmagan qizga nisbatan jinsiy zoʻravonlik sodir etilgani haqida xabar tarqaldi. Ijtimoiy himoya agentligi Fargʻona viloyati boshqarmasi izoh berdi.
Aniqlanishicha, 2026 yil 28 sentabr kuni Fargʻona viloyatining Rishton tumanida yashovchi 2012 yilda tugʻilgan voyaga yetmagan qiz Qoʻqon shahridagi mehmonxonada jinsiy zoʻravonlikka uchragan.
Mazkur holat yuzasidan 2026 yil 29 sentabr kuni Qoʻqon shahar prokuraturasi tomonidan Oʻzbekiston Respublikasi Jinoyat kodeksining 128-moddasi 3-qismi "a" bandi bilan jinoyat ishi qoʻzgʻatilgan.
Jinoyat ishi doirasida gumonlanuvchi ushlanib, 30 sentabr kuni unga nisbatan qamoqqa olish tarzidagi ehtiyot chorasi qoʻllanilgan.
Hozirda jinoyat ishi doirasida tegishli ekspertizalar tayinlanib, dastlabki tergov harakatlari davom ettirilmoqda.
Voyaga yetmagan jabrlanuvchining huquq va qonuniy manfaatlarini himoya qilish, uning ruhiy holatini tiklash hamda zarur yordam koʻrsatish maqsadida unga psixologik va yuriditik xizmatlar biriktirilgan.
Mazkur holat Ijtimoiy himoya milliy agentligining masʼul xodimlari nazoratiga olingan, deyiladi xabarda.
