Istanbulda Oʻzbekiston – Turkiya turizm forumi: turoperatorlar hamkorligi va Oʻzbekistonning turizm salohiyati taqdimoti tashkil etildi

Istanbul shahrida Oʻzbekiston – Turkiya turizm forumi boʻlib oʻtdi. Unda ikki mamlakat turizm sohasi vakillari, yetakchi turoperatorlar, sayyohlik kompaniyalari, mahalliy va xalqaro aviakompaniyalari hamda Turkiyaning yetakchi ommaviy axborot vositalari va internet nashrlari vakillari ishtirok etdi. Turizm va madaniyat vazirligi bilan hamkorlikda tashkil etilgan forum davomida Oʻzbekistonning boy tarixiy-madaniy merosi, ziyorat turizmi salohiyati, zamonaviy turistik infratuzilmasi va yangi sayyohlik yoʻnalishlari taqdim etildi. Turkiyadan mamlakatimizga sayyohlar oqimini oshirish, yangi turistik mahsulotlarni shakllantirish va ikki davlat oʻrtasidagi sayyohlik almashinuvini kengaytirish masalalari muhokama qilindi.

Tadbir doirasida Oʻzbekiston va Turkiya turoperatorlari oʻrtasida B2B uchrashuvlari tashkil etilib, qoʻshma turpaketlar ishlab chiqish, yangi sayyohlik dasturlarini yoʻlga qoʻyish hamda oʻzaro biznes aloqalarini mustahkamlash yuzasidan muzokaralar oʻtkazildi.

Shuningdek, Turkiyaning yetakchi OAV va internet nashrlari vakillariga mamlakatimizda turizm sohasida amalga oshirilayotgan islohotlar, yangi imkoniyatlar va sayyohlik manzillari haqida maʼlumot berildi. Oʻzbekistonning turizm salohiyatini Turkiya axborot makonida keng yoritish boʻyicha hamkorlik istiqbollari koʻrib chiqildi.

Forum yakunida ikki mamlakat turizm kompaniyalari oʻrtasida hamkorlikni rivojlantirish, qoʻshma turistik mahsulotlarni shakllantirish va Oʻzbekistonga turkiyalik sayyohlar oqimini oshirishga qaratilgan amaliy kelishuvlarga erishildi. Shuningdek, mamlakatimizning turizm salohiyatini Turkiya ommaviy axborot vositalari orqali targʻib qilish boʻyicha hamkorlikning ustuvor yoʻnalishlari belgilab olindi.