Hamshiralikka ishga qabul qilish uchun 5 ming dollar soʻragan shaxs ushlandi
Ayblanuvchi boshqa fuqaroni Qoʻngʻirot lokomotiv deposiga hamshira lavozimiga ishga joylashtirishni vaʼda qilgan.
Qoraqalpogʻistondahamshira lavozimiga ishga joylashtirishni vaʼda qilib, evaziga 5 ming dollar talab qilgan shaxs ushlandi. Bu haqda Ichki ishlar vazirligi eʼlon qilgan videolavhada xabar berildi.
Maʼlum qilinishicha, "Xavfsiz va sogʻlom yurt" keng qamrovli tezkor profilaktik tadbiri doirasida Transport va turizm obʼektlarida xavfsizlikni taʼminlash departamenti masʼul xodimlari tomonidan tezkor tadbir oʻtkazilgan.
Unda Qoʻngʻirot tumanida yashovchi fuqaro murojaat qilib, unga yuqori turuvchi tanishlari orqali Qoʻngʻirot lokomotiv deposidagi boʻsh hamshira lavozimiga ishga joylashtirib qoʻyish vaʼda qilinganini maʼlum qilgan. Bu xizmat evaziga undan 5 ming dollar talab qilingan va mablagʻning 2,5 ming dollarini oldindan berish soʻralgan.
Tezkor tadbir davomida Qoʻngʻirot mintaqaviy temir yoʻlida ishlovchi, 2002 yilda tugʻilgan fuqaro kelishilgan 5 ming dollardan 2,5 ming dollarini olayotgan vaqtida xolislar ishtirokida ushlangan.
Mazkur holat yuzasidan fuqaroga nisbatan Jinoyat kodeksining 168 va 211-moddalari bilan jinoyat ishi qoʻzgʻatilgan. Hozirda dastlabki tergov harakatlari olib borilmoqda.
