Fargʻonada yuzdan oshiq bolaning zaharlanishi boʻyicha aybdorlar qamoqqa qaytarildi
21 sentabr kuni Furqat tuman sudi ularni ozodlikdan mahrum qilish bilan bogʻliq boʻlmagan jazoga hukm qilib, sud zalidan ozod etgan edi.
Fargʻonada 105 nafar bola zaharlangan bogʻcha ishi boʻyicha aybdorlar qamoqqa qaytarildi.
Davlat bogʻchalarida bolalarning ommaviy zaharlanishiga sabab boʻlgan "Garden Catering Trade" MChJ mansabdorlariga nisbatan sud hukmi oʻzgartirildi.
Fargʻona viloyati sudi kassatsiya instansiyasi MChJ rahbarini 4 yilga, texnologini esa 3,5 yilga ozodlikdan mahrum qildi.
Har ikki shaxs sud zalida qamoqqa olindi.
Eslatib oʻtamiz, 21 sentabr kuni Furqat tuman sudi ularni ozodlikdan mahrum qilish bilan bogʻliq boʻlmagan jazoga hukm qilib, sud zalidan ozod etgan edi.
Sud hukmida keltirilishicha, “Garden catering trade” MChJ mansabdorlari kunlik tuzilgan taomnomalarda bola sonini asossiz sunʼiy koʻpaytirib koʻrsatib, bu haqida soxta hisobotlar shakllantirgan holda toʻlovga taqdim etish orqali 330,8 mln soʻm byudjet mablagʻlarini oʻzlashtirish yoʻli bilan talon-toroj qilgan. MChJ tomonidan 35 mln soʻmlik elektr energiyasi ham yashirin ravishda talon-toroj qilinib, Quvasoy shahar elektr taʼminoti korxonasi manfaatlariga 105,8 mln soʻm zarar yetkazilgan.
