Toshkentning 8 mahallasida sunʼiy koʻllar tashkil etilmoqda
Loyiha doirasida shaharda suvli maydonlar va yashil hududlarni koʻpaytirish, changlanish darajasini kamaytirish hamda ekologik infratuzilmani rivojlantirish koʻzda tutilgan.
Toshkent shahrida atmosfera havosi sifatini yaxshilash, ekologik muhitni sogʻlomlashtirish va aholi uchun qulay mikroiqlim yaratish maqsadida sunʼiy koʻllar tashkil etish ishlari olib borilmoqda.
Mazkur tashabbus Ekologiya va iqlim oʻzgarishi milliy qoʻmitasi hamda Toshkent shahar hokimligi tomonidan, Oʻzbekiston Respublikasi Prezidentining 2026 yil 25 martdagi PF–46-sonli «Atmosfera havosi sifatini yaxshilashga qaratilgan «Toza havo» umummilliy loyihasini amalga oshirish boʻyicha chora-tadbirlar toʻgʻrisida»gi Farmoni ijrosi doirasida amalga oshirilmoqda.
Loyiha doirasida shaharda suvli maydonlar va yashil hududlarni koʻpaytirish, changlanish darajasini kamaytirish hamda ekologik infratuzilmani rivojlantirish koʻzda tutilgan.
Jumladan, Chilonzor tumanidagi «Beshyogʻoch», Sergeli tumanidagi «Xonabodtepa» va «Qumariq», Yunusobod tumanidagi «Bogʻiboʻston», Mirobod tumanidagi «Yuksalish», Shayxontohur tumanidagi «Ipakchilik», Uchtepa tumanidagi «Qoʻrgʻontepa» hamda Olmazor tumanidagi «Zamondosh» mahallalarida sunʼiy koʻllar barpo etiladi.
Sunʼiy koʻllarning tashkil etilishi shahar hududlarida suv va yashil maydonlar ulushini oshirish, mahalliy mikroiqlimni yaxshilash hamda aholi uchun yanada qulay va sogʻlom ekologik muhit yaratishga xizmat qiladi.
