Toshkentda avtobus haydovchisi baxtsiz hodisa qurboni boʻldi
Haydovchi yoʻlovchilarni avtoshohbekatda tushirib, avtobusni toʻxtatgan vaqtida texnik qoidalarga amal qilmaslik oqibatida transport vositasining qoʻl tormozini faollashtirmagan. Avtobusni toʻxtatishga uringan vaqtida haydovchi J.Z. uning ostida qolgan.
Toshkent shahrida 2026 yil 7 noyabr kuni 82-sonli yoʻnalishdagi avtobus haydovchisi bilan oʻlim bilan yakunlangan baxtsiz hodisa sodir boʻldi. Bu haqda “Toshshahartransxizmat” AJ axborot xizmati xabar berdi.
Maʼlum qilinishicha, hodisa 82-sonli avtobus yoʻnalishida faoliyat yurituvchi haydovchi J.Z. bilan yuz bergan.
Haydovchi yoʻlovchilarni avtoshohbekatda tushirib, avtobusni toʻxtatgan vaqtida ehtiyotsizlik va texnik qoidalarga amal qilmaslik oqibatida transport vositasining qoʻl tormozini faollashtirmagan hamda oʻzi avtobusni tark etgan.
Oqibatda avtobus oʻz-oʻzidan harakatlana boshlagan. Buni koʻrgan zahoti transport vositasini toʻxtatishga uringan vaqtida haydovchi J.Z. avtobus ostida qolgan va vafot etgan.
Avvalroq Toshkentda yoʻlovchi avtobusi yonib ketgandi.
