«Siz meni ham, oʻzingizni ham noqulay ahvolga solib qoʻyasiz» — Sadir Japarov ayolning oʻziga bagʻishlangan sheʼrini oʻqishiga ruxsat bermadi
Japarov jamoatchilikda aholi bilan uchrashuvlarga uni ochiqchasiga maqtash uchun maxsus odamlar taklif qilinayotgandek taassurot uygʻotishi mumkinligini taʼkidladi.
Qirgʻiziston prezidenti Sadir Japarov 6 noyabr kuni Chuy viloyatining Sokuluk tumani aholisi bilan uchrashuv chogʻida oʻziga bagʻishlangan sheʼrni oʻqimoqchi boʻlgan ayolni toʻxtatdi. Bu haqda “AKIpress” xabar qildi.
Uchrashuv davomida mahalliy aholi vakili boʻlgan ayol dastlab oʻz murojaatini bildirdi. Shundan soʻng u davlat rahbariga bagʻishlab yozilgan sheʼrni oʻqib berish niyatida ekanini maʼlum qildi.
Biroq prezident bunga qarshi chiqdi va sheʼrni oʻqimaslikni soʻradi.
«Hokimiyatni maqtash kerak emas. Bu bilan siz meni ham, oʻzingizni ham noqulay ahvolga solib qoʻyasiz. Keyin odamlar meni maqtaydigan “navbatchi” fuqarolarni yigʻib olgan, deb gapirishadi», — dedi Sadir Japarov.
Prezident bunday holat jamoatchilikda aholi bilan uchrashuvlarga uni ochiqchasiga maqtash uchun maxsus odamlar taklif qilinayotgandek taassurot uygʻotishi mumkinligini taʼkidladi.
Shu sababli u ayolning sheʼrini tinglashdan bosh tortdi.
