Erkinjon Turdimov beshta rektorni ishdan boʻshatdi – OAV
Jumladan, Oʻzbekiston davlat jahon tillari universiteti rektori Ilhomjon Toʻxtasinov va Samarqand davlat chet tillari instituti rektori Bahodir Holiqov lavozimidan ozod etilgan.
Oʻzbekistondagi oliy taʼlim muassasalaridagi 5 rektor lavozimidan ozod etilgani aytilmoqda. Bu haqda Qalampir nashri xabar berdi.
Manbaning bildirishicha, bugun, 6 noyabr kuni Taʼlim va ilm-fan vaziri Erkinjon Turdimov oʻtkazgan yigʻilishda Oʻzbekistondagi 5 ta OTM, jumladan, Oʻzbekiston davlat jahon tillari universiteti rektori Ilhomjon Toʻxtasinov va Samarqand davlat chet tillari instituti rektori Bahodir Holiqov lavozimidan ozod etilgan.
Jahon tillari universiteti rektorining ishdan olinishi “Xavfsiz talaba” ilovasi bilan bogʻliq mojaro tufayli yuz bergani aytilmoqda.
Avvalroq “Xavfsiz talaba” ilovasi bilan bogʻliq mojaro ortidan Jahon tillari universitetning Tarjimonlik fakulteti dekani Ulugʻbek Yoʻldoshev ishdan olingandi.
Tarqalgan videolarda talabalardan “Xavfsiz talaba” ilovasini oʻrnatish talab qilinayotgani, ayrim hollarda bunga rozi boʻlmaganlar darslarga kiritilmayotgani maʼlum qilingandi.
