2026 yilda ekstremistik va terrorchilik xususiyatiga ega 49 mingdan ziyod internet-resurs aniqlandi
DXX rahbari 2021–2026 yillarga moʻljallangan Ekstremizm va terrorizmga qarshi kurashish boʻyicha milliy strategiyani amalga oshirish doirasida idoralararo va xalqaro hamkorlik mexanizmlari takomillashtirilganini taʼkidladi.
DXX raisi general-polkovnik Bahodir Qurbonov Xavfsizlik masalalari boʻyicha ShHT plyus birinchi ekspertlar muloqotining ochilishida nutq soʻzladi.
Joriy yilning 6 noyabr kuni Samarqandda Xavfsizlik masalalari boʻyicha ShHT plyus birinchi ekspertlik muloqoti boʻlib oʻtmoqda.
Tadbirni Oʻzbekiston Respublikasi Davlat xavfsizlik xizmati Raisi general-polkovnik Bahodir Qurbonov kirish soʻzi bilan ochib berib, ishtirokchilar eʼtiborini terrorchilik va ekstremistik tashkilotlar oʻz mafkurasini tarqatish, tarafdorlarni yollash, teraktlarni moliyalashtirish, ularga tayyorgarlik koʻrish hamda amalga oshirishda raqamli texnologiyalardan faol foydalanayotganiga qaratdi.
"Birgina 2026 yilda ekstremistik va terrorchilik xususiyatiga ega 49 mingdan ziyod internet-resurs aniqlangan boʻlib, bu 2025 yilgi koʻrsatkichga (43 mingga yaqin) nisbatan 14% koʻpdir. Bunday tendensiya radikal gʻoyalarni targʻib qilishda global tarmoqdan foydalanish koʻlami ortib borayotganini yaqqol koʻrsatadi", — dedi Xizmat raisi.
DXX rahbari 2021–2026 yillarga moʻljallangan Ekstremizm va terrorizmga qarshi kurashish boʻyicha milliy strategiyani amalga oshirish doirasida idoralararo va xalqaro hamkorlik mexanizmlari takomillashtirilganini taʼkidladi.
Oʻzbekiston tomonidan olib borilayotgan ishlarning natijalari xalqaro reytinglarda ham oʻz ifodasini topmoqda. Jumladan, 2026 yilgi Global terrorizm indeksida Oʻzbekiston 96-oʻrinni egallagani (minimal xavf toifasi) ushbu illatga qarshi kurashishda milliy yondashuvning samaradorligini namoyon etdi.
DXX rahbari oʻz nutqida raqamli transformatsiya davrida xavfsizlikni taʼminlash boʻyicha ustuvor yoʻnalishlariga toʻxtaldi. Ular qatoridan raqamli muhitda terrorchilar faoliyatining yangi shakl va usullarini aniqlash, shuningdek, sunʼiy intellektdan terrorchilik maqsadlarida foydalanishning oldini olish oʻrin olgan.
Maʼruza yakunida ushbu Muloqotni oʻtkazish gʻoyat dolzarb va zarur ekani qayd etildi. Tadbir doirasida ishtirokchilar xavfsizlikka joriy tahdid va xavf-xatarlarni muhokama qiladi hamda xalqaro va mintaqaviy darajada hamkorlikni mustahkamlashga qaratilgan yagona chora-tadbirlarni ishlab chiqadi.
