Prezident Olot tumani hokimi Nargiza Neʼmatovani mukofotladi
Prezident hokimni oʻz hududini kompleks rivojlantirishda alohida jonbozlik koʻrsatayotganini eʼtirof etdi.
Yigʻilishda taʼlim va tibbiyot sohalaridagi vazifalar ham koʻrib chiqildi.
Tadbirkorlarga yer ajratib, xususiy bogʻcha va maktablarni koʻpaytirish, maktab bitiruvchilarining 50 foizini texnikumlarga jalb qilish vazifasi qoʻyildi. Texnikumlarni yirik tadbirkorlar va investorlar bilan bogʻlash, xalqaro taʼlim dasturlarini joriy etish zarurligi taʼkidlandi. Viloyatdagi oʻnta davlat va xususiy oliy taʼlim muassasasida dual taʼlim qamrovini ikki baravar oshirish rejalashtirilgan.
Joriy yilda 29 ta shifoxona va poliklinikani yangilash ishlari amalga oshirildi. Shu bilan birga, tibbiy xizmat sifati, ayniqsa, birlamchi boʻgʻin faoliyati boʻyicha hali yechimini kutayotgan masalalar borligi qayd etildi.
Mutasaddilarga birlamchi tibbiy xizmatni yaxshilash, sohaga investitsiya jalb etish va xorijda tajriba orttirgan vatandoshlar imkoniyatidan foydalanish topshirildi.
Prezidentimiz oʻz hududini kompleks rivojlantirishda Olot tumani hokimi Nargiza Neʼmatova alohida jonbozlik koʻrsatayotganini eʼtirof etib, davlat va boshqaruv idoralaridagi koʻp yillik samarali mehnati, yangi ish oʻrinlarini yaratish orqali aholi farovonligini taʼminlash yoʻlidagi xizmatlari uchun uni “Fidokorona xizmatlari uchun” ordeni bilan mukofotlashga qaror qilganini eʼlon qildi.
Yigʻilishda muhokama qilingan vazifalar yuzasidan tarmoq va hududlar rahbarlarining hisobotlari hamda kelgusi yilga rejalari tinglandi.
