Toshkentda zaharlangan qozogʻistonlik futbolchilar boʻyicha jinoyat ishi ochildi
Ular mehmonxonada nonushta vaqtida yarim qovurilgan tuxum va sosiska isteʼmol qilgan. Shu kunning oʻzida ularning 13 nafarida qayt qilish, ich ketish, qorin ogʻrigʻi va tana haroratining koʻtarilishi kabi belgilar kuzatilgan.
2026 yil 1 noyabr kuni futbol musobaqasida ishtirok etish uchun Qozogʻistondan mamlakatimizga kelgan 20 nafar bola va ularning yaqinlari Toshkent shahridagi mehmonxonada nonushta vaqtida yarim qovurilgan tuxum va sosiska isteʼmol qilgan.
Shu kunning oʻzida ularning 13 nafarida qayt qilish, ich ketish, qorin ogʻrigʻi va tana haroratining koʻtarilishi kabi belgilar kuzatilgan.
Shundan soʻng ular tez tibbiy yordam xizmati tomonidan Respublika ixtisoslashtirilgan epidemiologiya, mikrobiologiya, yuqumli va parazitar kasalliklar ilmiy-amaliy tibbiyot markaziga olib kelingan.
Mazkur holat yuzasidan Chilonzor tumani prokuraturasi tomonidan Jinoyat kodeksining 276¹³-moddasi (Sanitariyaga oid qonunchilikni yoki epidemiyaga qarshi kurash qoidalarini buzish) bilan jinoyat ishi qoʻzgʻatilgan.
Hozirda Chilonzor tumani IIO FMB huzuridagi Tergov boʻlimi tomonidan dastlabki tergov harakatlari olib borilmoqda.
