Toshkentda mushukka nisbatan shafqatsiz munosabatda boʻlgan erkak 7 sutkaga qamaldi
Tarmoqlarda tarqalgan videoda erkak uy yoʻlagida mushukchani polga bosib, oldingi oyogʻini burayotgani aks etgan.
Toshkent shahar Shayxontohur tumanida koʻp qavatli uy yoʻlagida mushukchaga nisbatan shafqatsiz munosabatda boʻlgan erkakka 7 sutka maʼmuriy qamoq jazosi tayinlandi. Bu haqda Toshkent shahar IIBB matbuot xizmati xabar berdi.
Avvalroq mazkur holat videosi ijtimoiy tarmoqlarda tarqalgan.
Huquq-tartibot idoralari xodimlari tomonidan huquqbuzarga nisbatan Maʼmuriy javobgarlik toʻgʻrisidagi kodeksning 111-moddasi (Hayvonlarga nisbatan shafqatsiz munosabatda boʻlish) boʻyicha maʼmuriy bayonnoma tuzilib, hujjatlar jinoyat ishlari boʻyicha Shayxontohur tuman sudiga yuborilgan.
Sud qarori bilan unga 7 sutka maʼmuriy qamoq jazosi berilgan.
Eslatib oʻtamiz, hodisa haqida 29 oktabr kuni maʼlum boʻlgan edi. Tarmoqlarda tarqalgan videoda erkak uy yoʻlagida mushukchani polga bosib, oldingi oyogʻini burayotgani aks etgan. Keyinchalik veterinarlar hayvonning bilak suyagida yorilish borligini aniqlashgan. 30 oktabr kuni Toshkent shahar IIBB erkakning shaxsini aniqlangan.
