Prezident: "Chet elda mehnat qilayotgan yurtdoshlarimiz — haqiqiy mard insonlar!"
Prezident xorijda mehnat qilayotgan birorta ham yurtdoshimiz oʻz muammosi bilan yolgʻiz qolmasligi kerakligini qatʼiy taʼkidladi.
Bugun Prezident Shavkat Mirziyoyev poytaxtimizning Uchtepa tumanidagi "Intil" xalqaro til va kasbga oʻqitish markazida mehnat migratsiyasi sohasidagi ustuvor vazifalar yuzasidan yigʻilish oʻtkazdi.
Davlatimiz rahbari xorijda mehnat qilayotgan yurtdoshlarimiz haqida alohida toʻxtaldi:
"Chet elda ishlayotgan har bir yurtdoshimiz oilasining rizqi, farzandlari kelajagi uchun tinmay mehnat qilayotgan haqiqiy mard insonlardir. Ular ham bizning fuqarolarimiz, bizning farzandlarimiz. Qayerda ishlashidan qatʼi nazar, fuqarolarimiz huquqini himoya qilish — davlatning doimiy burchi va vazifasi".
Prezident xorijda mehnat qilayotgan birorta ham yurtdoshimiz oʻz muammosi bilan yolgʻiz qolmasligi kerakligini qatʼiy taʼkidladi.
Endilikda chet elda muammoga duch kelgan fuqaro elchi yoki konsulni izlab yurmaydi. "Onlayn mahalla" platformasi orqali yordam soʻrab murojaat qoldiradi. Zarur vaziyatda elchining oʻzi uning oldiga borib, huquqlarini himoya qiladi va muammosiga yechim topadi.
Davlatimiz rahbari mutasaddilarga ushbu tizimni 10 kun ichida yoʻlga qoʻyish va uning samarali ishlashini taʼminlash boʻyicha takliflar kiritishni topshirdi.
Muhim jihati — mehnat migrantlariga boʻlgan munosabat oʻzgarmoqda. Xorijda ishlayotgan inson shunchaki pul joʻnatuvchi emas, balki davlat himoyasiga haqli, qadri baland fuqaro sifatida eʼtirof etilmoqda.
