Shveysariyada Xellouin yurishlari ortidan ommaviy tartibsizliklar yuz berdi
Syurix koʻchalarida odamlar mashinalar, elektr skuterlar va axlat konteynerlariga oʻt qoʻyishdi, doʻkon oynalarini sindirishdi va politsiya xodimlariga hujum qilishdi.
Shveysariyaning Syurix shahri politsiyasi shaharning 4-okrugida Xellouin bayrami paytida boshlangan ommaviy tartibsizliklar haqida xabar berdi.
Politsiya maʼlumotlariga koʻra, mashinalar va binolarning yoqib yuborilishi, shuningdek, huquqni muhofaza qilish organlari xodimlariga hujumlar oldindan rejalashtirilgan edi. 20 Minuten bu voqeani "oʻta chap qanot ekstremistlarining harakati" deb atadi.
"Langshtrassedagi Piazza Cella maydonida bir necha yuz kishi toʻplanib, bayram ishtirokchilari bilan aralashdi. Baʼzilari niqob, koʻzoynak yoki Xellouin mavzusidagi kiyimlarni kiyib olishgandi", deyiladi politsiyaning matbuot uchun bayonotida.
Olomon tez orada kichikroq guruhlarga boʻlinib, butun tuman boʻylab tarqaldi.
Turli koʻchalarda odamlar mashinalar, elektr skuterlar va axlat konteynerlariga oʻt qoʻyishdi, doʻkon oynalarini sindirishdi va politsiya xodimlariga hujum qilishdi, toshlar va mushaklar otishdi. Ularga qarshi koʻz yoshartuvchi gaz, suv toʻplari va rezina oʻqlar ishlatilgan. Shahar politsiyasi zarar miqdorini baholashda davom etmoqda.
