Navoiyda togʻda doʻlana terganlar jarimaga tortildi
Xatirchi tumani ekologiya va iqlim oʻzgarishi boʻlimi ekopolitsiya xodimlari tomonidan reyd tadbiri oʻtkazilgan.
Navoiy viloyatining Xatirchi tumanida togʻda doʻlana tergan shaxslar jarimaga tortildi. Bu haqda viloyat Ekologiya boshqarmasi xabar berdi.
Maʼlum qilinishicha, Xatirchi tumani ekologiya va iqlim oʻzgarishi boʻlimi ekopolitsiya xodimlari tomonidan reyd tadbiri oʻtkazilgan. Unda Angidon mahallasi hududida ikki kishi tegishli ruxsatnomasiz doʻlana mevalarini yigʻib, olib ketayotgani aniqlangan.
Holat yuzasidan Sh.S. va Yo.R.ga nisbatan Maʼmuriy javobgarlik toʻgʻrisidagi kodeksning 79-1-moddasi (oʻsimlik dunyosi obʼektlarini yigʻish, tayyorlash va ulardan foydalanish tartibi hamda shartlarini buzish) 1-qismi bilan maʼmuriy bayonnomalar rasmiylashtirilgan.
Huquqbuzarlardan biriga BHMning 10 baravari, ikkinchisiga esa 7 baravari miqdorida, jami 7 mln 480 ming soʻm maʼmuriy jarima belgilandi. Shuningdek, tabiatga yetkazilgan zarar 1 mln 3 ming soʻm etib hisoblandi.
Endi doʻlana tergan “huquqbuzarlar“ qariyb 7,5 mln soʻm jarima va 1 mln soʻm tabiatga yetkazilgan zararni toʻlashi kerak boʻladi.
