Ziroat Mirziyoyeva Turkiy davlatlar tashkiloti Oila va xotin-qizlar kengashining birinchi yigʻilishida ishtirok etdi
Oʻzbekiston birinchi xonimi oʻz nutqida qizlarning zamonaviy taʼlim olish imkoniyatlarini kengaytirish va xotin-qizlar tadbirkorligini rivojlantirishga qaratilgan qator tashabbuslarni ilgari surdi.
Oʻzbekiston Respublikasi Prezidentining Anqara shahriga tashrifi va Turkiy davlatlar tashkiloti sammiti doirasida mamlakatimiz Birinchi xonimi Ziroat Mirziyoyeva TDT Oila va xotin-qizlar kengashining birinchi yigʻilishida ishtirok etdi.
TDTning 13-sammiti doirasida tashkil etilgan Oila va xotin-qizlar kengashi turkiy davlatlar oʻrtasida oila institutini mustahkamlash, xotin-qizlar huquqlarini himoya qilish va ularning imkoniyatlarini kengaytirish boʻyicha hamkorlikni qoʻllab-quvvatlashga qaratilgan.
Kengash huzuridagi davlat va hukumat rahbarlari rafiqalaridan iborat Oliy faxriy kengashning ilk yigʻilishi "Hamjihatlikdan institutsional hamkorlik sari: Turkiy dunyoda oila va xotin-qizlar" mavzusiga bagʻishlandi.
Ziroat Mirziyoyeva oʻz nutqida qizlarning zamonaviy taʼlim olish imkoniyatlarini kengaytirish va xotin-qizlar tadbirkorligini rivojlantirishga qaratilgan qator tashabbuslarni ilgari surdi.
– Ayolning bilimi va mehnati qadrlangan, oilada oʻzaro hurmat va hamjihatlik qaror topgan muhit butun jamiyatni mustahkamlaydi,– dedi Birinchi xonim.
Onalik va bolalikni muhofaza qilish, inklyuziv taʼlimni rivojlantirish hamda ehtiyojmand oilalarni qoʻllab-quvvatlash yuzasidan ham takliflar bildirildi. Bolalar va oʻsmirlar uchun xavfsiz internet muhitini yaratish masalasiga alohida eʼtibor qaratildi.
Soʻzining yakunida Ziroat Mirziyoyeva yigʻilishni tashkil etgani uchun Turkiya Birinchi xonimi Emine Erdogʻanga tashakkur izhor etdi. Qabul qilingan qarorlar oilalar xotirjamligi, xotin-qizlar uchun yangi imkoniyatlar va bolalar farovonligiga xizmat qilishiga umid bildirdi.
