V "Zakovat-Gambit" turniri gʻoliblari 620 million soʻmlik sovrin jamgʻarmasi uchun kurashmoqda
Poytaxtimizda rekord darajadagi 5 831 nafar shaxmatchini oʻzida jamlagan V "Zakovat-Gambit" turnirining hal qiluvchi final oʻyinlariga start berildi.
Bu yilgi musobaqa yanada keng qamrovli boʻlishi va barcha shaxmatsevarlarga imkon berishi uchun ilk bor ikki xil saralash tizimi joriy etildi: avval respublikaning barcha 14 hududida yuzma-yuz bahslar, soʻngra esa onlayn platformada qoʻshimcha saralash oʻyinlari tashkil qilindi.
"Zakovat arena" binosida oʻtayotgan final bahslarida ishtirokchilar oʻz darajalariga koʻra beshta guruhga boʻlingan holda jami 620 million soʻmlik sovrin jamgʻarmasi uchun oʻzaro dona surmoqda. Ushbu guruhlarning har birida gʻoliblikni qoʻlga kiritganlarga 50 million, ikkinchi oʻringa 30 million, uchinchi oʻringa va ayollar oʻrtasidagi eng kuchli ishtirokchiga esa 20 million soʻmdan pul mukofotlari berilishi belgilangan.
Shu bilan birga, musobaqaning eng yosh qatnashchisi boʻlgan 8 yoshli Mustafo Poʻlatov va eng yoshi ulugʻ ishtirokchi 63 yoshli grossmeyster Toir Vohidovning har biriga 10 million soʻmdan maxsus mukofot topshiriladi. Turnirning yana bir eʼtiborga molik jihati shundaki, unda Jahongir Vohidov, Afruza Hamdamova va Umida Omonova kabi terma jamoamizning mashhur aʼzolari ham ishtirok etmoqda.
Nufuzli mehmonlar sifatida taklif etilgan jahon shaxmati julduzlari — grossmeysterlar Peter Leko va Hampi Koneru yosh sportchilarimizga qarshi seans oʻyinlari oʻtkazib, mamlakatimizda shaxmat juda tez rivojlanayotgani hamda yoshlarning koʻzidagi ishtiyoq ularda kuchli taassurot qoldirganini alohida taʼkidlashdi.
Barcha guruhlardagi yakuniy gʻoliblarni taqdirlash marosimi 30 oktabr kuni "Oʻzbekfilm" pavilonida tantanali ravishda oʻtkaziladi.
