Toshkentda havo sifati sabab himoya niqobidan foydalanish tavsiya etildi
Harorat pasayishi, shamolning kuchsizligi va havo massalarining shahar atrofida toʻplanishi ifloslantiruvchi moddalar tarqalishini cheklagan.
Toshkentda havo sifati yomonlashishi sabab himoya niqobidan foydalanish va ochiq havoda uzoq qolmaslik tavsiya etildi.
27 oktabrdan 28 oktabrga oʻtar kechasi poytaxtda havo sifati xalqaro AQI indeksi boʻyicha "noqulay", ayrim kuzatuv nuqtalarida "juda noqulay" darajada boʻlgani maʼlum qilindi.
Yunusobod, Olmazor, Yangihayot, Sergeli va Yashnobod tumanlarida oʻtkazilgan tungi oʻlchovlarning barchasida PM2,5 zarrachalari miqdori "juda noqulay" toifaga mos kelgan.
Harorat pasayishi, shamolning kuchsizligi va havo massalarining shahar atrofida toʻplanishi ifloslantiruvchi moddalar tarqalishini cheklagan.
28 oktabr kunduzi va kechqurun ham havo sifati xalqaro AQI boʻyicha "noqulay" darajada boʻlishi kutilmoqda.
Ayniqsa, bolalar, keksalar, homilador va emizikli ayollar, yurak-qon tomir hamda nafas yoʻli kasalliklari borlarga kechqurun va tunda imkoni boricha tashqariga chiqmaslik, derazalarni yopiq tutish tavsiya etilgan. Tashqariga chiqqanda himoya niqobidan foydalanish va ochiq havoda uzoq qolmaslik soʻralgan.
