Toshkentda 6 kishi is gazidan zaharlanib vafot etdi
Hodisa qurilish-taʼmirlash ishlari olib borilayotgan xususiy uyda sodir boʻlgan. Aniqlanishicha, uyning yertoʻla qismiga oʻrnatilgan isitish qozoni xavfsizlik talablariga javob bermagan.
2026 yil 25 oktabr kuni Toshkent shahrining Mirzo Ulugʻbek tumanida is gazidan zaharlanish oqibatida 6 nafar fuqaro vafot etdi.
Shuningdek, yana 2 nafar fuqaro ogʻir ahvolda shifoxonaga yotqizildi. Bu maʼlumotni Bosh prokuratura tasdiqladi.
Dastlabki maʼlumotlarga koʻra, hodisa qurilish-taʼmirlash ishlari olib borilayotgan xususiy uyda sodir boʻlgan. Aniqlanishicha, uyning yertoʻla qismiga oʻrnatilgan isitish qozoni xavfsizlik talablariga javob bermagan, gaz tarmogʻiga esa belgilangan tartibda tegishli texnik shartlarsiz ulanilgan.
Mazkur holat yuzasidan Mirzo Ulugʻbek tumani prokuraturasi tomonidan Jinoyat kodeksining 116, 257, 205-moddalari bilan jinoyat ishi qoʻzgʻatilgan.
Ayni paytda tergov harakatlari Toshkent shahar prokuraturasi tomonidan olib borilmoqda.
