Toʻqqiz oyda Oʻzbekiston IESlarida qancha elektr ishlab chiqarilgani ochiqlandi

Oʻzbekistonda ishlab chiqarilayotgan jami elektr va issiqlik energiyasining salmoqli qismi “Issiqlik elektr stansiyalari” AJ elektr stansiyalari hamda issiqlik markazlari zimmasiga toʻgʻri keladi.

Jamiyat tarkibida quvvati 6,9 GVt boʻlgan 8 ta elektr stansiyasi, quvvati 2,1 GVt boʻlgan 1 ta boshqaruvdagi elektr stansiyasi, shuningdek, “Toshkent issiqlik markazi” tarkibidagi 9 ta issiqlik markazi faoliyat yuritmoqda.

2026 yilning oʻtgan 9 oyi davomida “Issiqlik elektr stansiyalari” AJ tasarrufidagi korxonalar tomonidan 15,2 mlrd kVt·soat elektr energiyasi ishlab chiqarilib, prognoz koʻrsatkich 108 foizga, 5,9 mln Gkal issiqlik energiyasi uzatilib, prognoz koʻrsatkich 107 foizga bajarildi.

Elektr energiyasi ishlab chiqarish jarayonida shartli yoqilgʻining solishtirma sarfi 272,11 gramm/kVt·soatni tashkil etdi. Bu koʻrsatkich joriy yil uchun belgilangan prognoz koʻrsatkichdan 3,46 grammga, 2025 yilning mos davriga nisbatan esa 5,79 grammga kamdir.

Belgilangan energiya resurslarini ishlab chiqarish uchun oʻtgan davrda jami 3,8 mlrd kubmetr tabiiy gaz hamda 645,5 ming tonna koʻmir sarflandi.

Bugun Jamiyat tizimida energiya resurslarini tejash masalasiga alohida eʼtibor qaratilmoqda. Ushbu yoʻnalishda tizim korxonalarida energiya resurslaridan samarali foydalanish va ularni tejash ishlari ISO 50001 xalqaro standarti talablari asosida tashkil etilgan.

Mazkur standart talablari asosida Vazirlar Mahkamasi huzuridagi Oʻzenergoinspeksiya bilan kelishilgan holda 2026 yilga moʻljallangan tashkiliy-texnik chora-tadbirlar rejasi tasdiqlangan. Unga koʻra, joriy yilning 9 oyida belgilangan chora-tadbirlarni amalga oshirish hisobiga 52,0 mln kubmetr tabiiy gaz va 137,7 mln kVt·soat elektr energiyasi tejaldi.

Bunda tabiiy gazni tejash boʻyicha prognoz koʻrsatkichi 137,7 foizga, elektr energiyasini tejash boʻyicha esa 107 foizga bajarildi.