Markaziy Osiyo xalqaro taʼlim forumi ish boshladi
Prezident matbuot kotibi Sherzod Asadov tadbirda ishtirok etib, Oʻzbekiston rahbarining tadbir ishtirokchilariga yoʻllagan tabrigini oʻqib eshittirdi.
“Oʻzbekiston” xalqaro anjumanlar saroyida “Markaziy Osiyo — taʼlim, fan va innovatsiyalarning yangi makoni” mavzusidagi Markaziy Osiyo xalqaro taʼlim forumi oʻz ishini boshladi.
Forumning rasmiy ochilish marosimida Oʻzbekiston Respublikasi Prezidenti Administratsiyasi Kommunikatsiyalar departamenti rahbari — Prezident matbuot kotibi Sherzod Asadov ishtirok etib, Oʻzbekiston Respublikasi Prezidentining tadbir ishtirokchilariga yoʻllagan tabrigini oʻqib eshittirdi.
“Qariyb 85 million aholi istiqomat qilayotgan mintaqamizning bebaho boyligi bu – bilimga chanqoq, katta orzu-intilishlari bilan yashayotgan yosh avlodimizdir. Ana shu ulkan demografik salohiyatni qudratli intellektual kuchga aylantirishda eng samarali yoʻl – sifatli, zamonaviy taʼlim va tarbiyadir.
Yaqinda alohida Farmon qabul qilib, maktabgacha va maktab taʼlimi, kasbiy va oliy taʼlim hamda ilm-fan boshqaruvini yagona tizimga birlashtirdik. Shu tariqa boshlangʻich bilim va tarbiya olishdan yetuk mutaxassis va olim boʻlib shakllanish davrigacha boʻlgan maʼrifiy bosqichlarning uzviy bogʻliqligini taʼminlashni maqsad qilganmiz.
Bizning bu sohadagi strategik maqsadimiz – Markaziy Osiyoni oʻzaro ishonch va doʻstlik diyoriga, ilm-maʼrifat, yuksak texnologiyalar va innovatsiyalar birlashgan umumiy intellektual makonga aylantirishdir”.
Anjumanda Oʻzbekiston, Qozogʻiston, Qirgʻiz, Tojikiston va Turkmaniston mamlakatlarining taʼlim vazirlari, shuningdek, qator davlatlarning taʼlimga masʼul vakillari, xorijiy yetakchi universitetlar rahbarlari, xalqaro tashkilotlar vakillari va ekspertlar ishtirok etmoqda.
Forum doirasida taʼlim tizimining dolzarb masalalari, oliy taʼlim muassasalari oʻrtasidagi hamkorlik istiqbollari, ilmiy tadqiqotlar samaradorligini oshirish, innovatsion ishlanmalarni qoʻllab-quvvatlash va xalqaro akademik aloqalarni mustahkamlash masalalari muhokama qilinadi.
