Namanganda 5,6 mlrd soʻmlik dorilar saqlanayotgan yashirin ombor aniqlandi
Ushbu omborni farmatsevtika mahsulotlari savdosi bilan shugʻullanuvchi xususiy korxona rahbari hamda ishchisi boʻlgan aka-ukalar tashkil qilgan.
Davlat xavfsizlik xizmatining Namangan viloyati boʻyicha boshqarmasi xodimlari tomonidan viloyat Bojxona hamda Ichki ishlar boshqarmalari bilan hamkorlikda tezkor tadbir oʻtkazildi.
Tadbir davomida Uychi tumanida farmatsevtika mahsulotlari savdosi bilan shugʻullanuvchi xususiy korxona rahbari hamda ishchisi boʻlgan 1983 va 1986 yillarda tugʻilgan aka-uka tomonidan noturar bino yertoʻlasida tashkil etilgan yashirin ombor fosh etildi.
Omborni koʻzdan kechirish jarayonida xorijda ishlab chiqarilgan, umumiy taxminiy qiymati 5,6 mlrd soʻmni tashkil etuvchi 412 turdagi jami 67 923 birlikdagi dori vositalari kelgusida sotish maqsadida saqlanayotgani aniqlanib, protsessual tartibda rasmiylashtirib olindi.
Hozirda ushbu dori vositalariga nisbatan sudga oid kimyoviy, tovarshunoslik ekspertizasi tayinlanib, tergovga qadar tekshiruv harakatlari olib borilmoqda.
