“Dok-1 Maks" jabrlanuvchilariga kompensatsiya pullari toʻliq toʻlab berildi
Avvalroq sudlanganlardan belgilangan tovon pulining atigi 20 foizi undirilgani aytilgandi. Kompensatsiyaning qolgan qismi 2026 yil 20–24 oktabr kunlari davlat hisobidan toʻlangan.
Oʻzbekistonda “Dok-1 Maks” va “Ambronol” dori vositalaridan jabrlangan bolalarning oilalariga kompensatsiya toʻliq toʻlab berildi. Bu haqda farzandi vafot etgan hamda nogironlik orttirgan bolalarning ota-onalari maʼlum qilgan.
Kompensatsiyaning qolgan qismi 2026 yil 20–24 oktabr kunlari davlat hisobidan toʻlangan. Bosh prokuratura huzuridagi Majburiy ijro byurosi (MIB) matbuot kotibi Farrux Toshpoʻlatov ham ushbu maʼlumotni tasdiqladi.
Sud hukmlariga koʻra, jabrlanuvchilarga toʻlanishi belgilangan kompensatsiya Farmatsevtika tarmogʻini rivojlantirish agentligining sobiq rahbari va uning oʻrinbosarlari, shuningdek, dori ishlab chiqaruvchining Oʻzbekistondagi rasmiy dileri — Quramax MChJ vakillaridan undirilishi kerak edi.
Biroq OAV ota-onalar taqdim etgan bank hujjatlarini oʻrganib, uch yil davomida sudlanganlardan belgilangan tovon pulining atigi 20 foizi undirilganini aniqlagan. Oxirgi undiruv 2026 yil avgust oyida amalga oshirilgan.
Oktabr oyida esa kompensatsiyaning qolgan 80 foizi davlat hisobidan toʻliq qoplab berilgan. Ota-onalarning bildirishicha, masʼullar nogironlik orttirgan bolalarning holidan ham xabar olmoqda.
