Oʻzbekistonlik shaxs Koreyada taksi haydovchisini kaltaklashda gumonlanmoqda
Gumonlanuvchi oʻz avtomobilida noqonuniy ravishda yoʻlovchi tashimoqchi boʻlgan, mahalliy taksi haydovchisi esa bunga toʻsqinlik qilib, holatni va qoidabuzarlikni suratga olmoqchi boʻlgan.
Janubiy Koreyaning Hvason shahrida 30 yoshlar atrofidagi Oʻzbekiston fuqarosi 50 yoshli taksi haydovchisini kaltaklashda gumon qilinmoqda. Bu haqda qator mmahalliy OAVlar xabar berdi.
Hodisa 18 oktabr kuni Xyangnam hududida sodir boʻlgan.
Maʼlum boʻlishicha, gumonlanuvchi oʻz avtomobilida noqonuniy ravishda yoʻlovchi tashimoqchi boʻlgan, mahalliy taksi haydovchisi esa bunga toʻsqinlik qilib, holatni va qoidabuzarlikni suratga olmoqchi boʻlganida jagʻ qismiga zarba berilgan. Oqibatda taksi haydovchisi voqea joyida hushini yoʻqotib, yerga yiqilgan.
Avtomobil kuzatuv kamerasiga muhrlangan tasvirlarda tajovuzkor hushsiz yotgan fuqaroni oyoqlari va mushtlari bilan kaltaklashda davom etgani hamda unga birinchi yordam koʻrsatmasdan voqea joyidan gʻoyib boʻlgani aks etgan.
Koreya politsiyasi gumondorni 22 oktabr kuni video tahlil orqali aniqladi. U tez orada rasmiy soʻroqqa chaqiriladi va jabrlanuvchining tibbiy xulosasiga asoslanib, ayblovlar oshirilishi mumkin.
